კაპიტალი, რომელსაც სახელმწიფო ვერ იყენებს!

ვადასტურებთ, რომ საქართველოს გარეთ მცხოვრები ქართველობა, ჩვენი ქვეყნის მეგობრები და შვილები – დიდი ეროვნული და სახელმწიფოებრივი სიმდიდრეა, დღემდე გამოუყენებელი დიდი კაპიტალი. ეს დანაშაულია, მით უფრო, რომ წერილი, რომელსაც ახლა ვბეჭდავთ, თითქმის ათი წლის წინ დაიწერა. დიდია ამ საქმეში „საქართველოს ხალხთა ასამბლეის“ როლი, რომელმაც 2009 წლის სოჭის კონგრესიდან მოყოლებული, უამრავ ქვეყანაში ჩაატარა შეხვედრები ემიგრანტებთან და სწორედ ამის საფუძველზე შეიქმნა ეს დოკუმენტიც, რომელიც არაერთგზის გამოქვეყნდა, ამ პერიოდის ყველა პირველ ხელისუფალს დაეგზავნა შესაბამისი ცვლილებებით. შედეგი: მდგომარეობა არათუ იცვლება, არამედ უარესდება. ასე გაგრძელება აღარ შეიძლება. სწორედ ამიტომ აქვს კონგრესის ჩატარებას დიდი მნიშვნელობა. სწორედ ამიტომ ვაქვეყნებთ ამ პროგრამაში ემიგრანტთა ტკივილიანი განწყობის ამ დოკუმენტს იმ რედაქციით, რომლითაც გაზეთ „ლიტერატურულ საქართველოში“ გამოქვეყნდა 2013 წლის სექტემბერში და რომელიც მიიღო მეცნიერთა კონგრესმა ეროვნული თანხმობისთვის, „ქართული ერთობის დარბაზის“ გელათის, თბილისის, ბათუმის და გორის სესიებმა.